Perqué una Federacion deLs Totèms ?

La region Occitania es rica de mai de 60 animals totemics.
D’unes, coma lo Polin de Pezenàs e la Tarasca de Tarascon, benefician d’una inscripcion sus las listas del patrimòni cultural immaterial de l’UNESCO.
Pr’aquò aquel patrimòni es fragil.

Dempuèi sègles, repausa sus l’energia de grops apassionats e benevòls que benefician sonque de sostens aleatòris dins de contèxtes istorics ont aqueles tradicions jamai foguèron avaloradas.
Qué que ne sià, las populacions localas jamai n’an botinhat lor reconeissença.
Uèi, los actors d’aquel patrimòni totemic cercan a se federar per tal d’èstre capable de respondre a las exigéncias qu’impausa la transmission dins una situacion novèla dins la quala los publics se diferencian e los escambis se multiplican.

Consí se dobrir a los autres sens se perjurar ?
Consí gardar la dimension e la valor locala de la fèsta, de la carrièra e de los escambis quora la fèsta, la carrièra e los escambis mudan ?

Coma los gigants de Belgica e del Nòrd de Françe o del bestiari catalan, los nòstres totèms an besonh de se parlar, de s’ajudar e de se projectar dins l’avenidor.

La federacion TOTEMIC desira collaborar amb las populacions localas et lors elegits, los cercaires e los saberuts locals, los artistas e los animators de las politicas culturalas e patrimonialas, los repreesentants de los mitans educatius e socials … per fin d’obrar ensemble a la salvagarda d’aquel patrimòni e de pausar d’actes fòrts ont la fèsta, la tradicion e l’imaginari se transméton, s’avaloran e se partejan.

 

amb quaL, per quaL ?

Actors del fenomèn totemic (menaires, portaires, musicaires…), artistas (musicaires, dançaires, contaires, plasticaires, escènografs, …), elegits locals, ensenhaires, amators, simpatizants o simples curiós, vosautres sètz tots convidats a participar a la federation TOTEMIC.

La vida dels TOTÈMS nos concernís tots.
Son al còr de las nòstres festivitats, son los emblèmas de nòstres identitats frairenalas.
Lor avenidor depend de nòstre capacitat a representar çò que eiretam e çò que legam.

consí ?

L’associacion « los Amics del Polin de Pesenàs » a assegurat las iniciativas fondatoras e a fisat a Perrine ALRANQ la coordinacion de los partenaris associatius e de los institucionals implicats.

Un Comitat de Pilotatge s’es constituat per fin de mobilizar l’ensemble de los actors, animators e cercaires del patrimòni totemic e de sensibilizar l’opinion publica.
An participats en aquel Comitat, en mai que los Amics del Polin, lo Collectiu del Cese Mascat, la Baragònha de Sant-Christòl, lo Chivalet de Cornonterralh, lo Cirdòc, la Region Occitania (mission per las culturas occitanas et catalanas), lo Ministèri de la Cultura, l’Universitat Panthéon-Sorbonne…

Puèi los actors totemics an estat convidats a participar a un FORUM DUBÈRT -biais original d’animacion participativa permetent de mutualizar sensibilitats e creativitats – per fin de :
– reculhir nòstres besonhs, aspiracions, envejas;
– partejar nòstras idèas, expériencias e coneissenças;
– imaginar e bastir l’avenidor de la federacion a partir de las nòstras contribucions